FA INONA NY SORAKANTO ? (Andy Rebabe)

FA INONA NY SORAKANTO ?

Ny Soratra akory,
Tsy hoe kitambatambatry ny teny hafahafa
tsy takatra takarina,
na torapo sendaotra mampijafajafa
ny ratra nofongarina.
Ny Soratra tsy teny alefalefa fotsiny
tsy misy iantefany
ka toy ny hazo boboka vao ahontsonkontsona
dia rara-boa malàny !

Ny Soratra ?
Fa fanahy zaraina mandona ny Fisiana
hanako an'eritreritra,
fa ody mahagaga, fanafana iangaliana
ny mampievinevina,
fa Teny tsara sokitra, voatevika ao am-po
ho rakitra tadidy,
Izay no Sorakanto, tsy manam-paharoa
satria fanalahidy !

Andy Rebabe
--------