RY FOKO... MITONIA!!! (AORN)

Lay endrikao nitsiky
Tanaty ranon’orona
Namoha ny tato anatiko…
Dia kotsa koa ny foko
Nitempo anao mangiana
Ka nila tsy ho tantiko

Lay masonao baliaka
Mangataka fijery
Nambabo ny fitiavako…
Ny masoko tsy sahy
Nijery sy nibanjina
Fa resinao rahavako

Lay tananao nitsotra
Nanolotra arahaba
Toa nampangovitra ahy…
Ny tanako natolotro
Dia vahotra ny saiko
Toa faly… toa tsy sahy

Lay feonao miangola
Toa feo manambitamby
Mandrotsirotsy mamy…
Dia satry hihaino foana
Tsy hiala fa hiampify
Akaikinao hatrany

Ny foko ve no adala
Manaiky ambony ihany
Sa resy toa tsy niady?
Fa Mbola ankamantatra
Ny ampitso tsy hay fantarina
Dia babonao sahady
……Ry foko, mitonia!!!!
--------