VARY IRAY LOVIA (Clarisse Ratsifandrihamanana)

VARY IRAY LOVIA.

Hano re, ry sombinaiko, ito vary an-dovia.
Mazotoa ka lanio, tapero ny anjaranao…
Aza dia ariana foana, ararakao tahaka ity.
Nahoana, ianao, no mampitamby? – manadala loatra ianao!

Hitanao, ilay omaly, fony isika raha nandalo
Fefiloha tomefy lokon-taninketsa vao vitaina?
Nisy olo-nisomeby: roa… telo… fito… valo…
Ka ny dinitr’izy ireo, potraka nandritra aina.

Hitanao ny fotapotaka maditidity amin-tanany
Sy ny dinta manirano izay manaikitra ny tongony,
Ny trahotrahon-dranomaso miampy kiakiakan-janany
Izay danihin-taninkandro eo anilan-tranombongony?

Hitanao ireo rehetra folapolaka sy ngoly,
Niondrikondrika eny ho eny nanatsatoka ny voly?
Manandrandra vokatra izy, ka ny vavaka nakariny,
Sitrany ny mba ho to… hitahiana tanimbariny!

Hitanao ny havizanany, hitanao ny fiezahany
Tanoloan’ny” Asa mafy”, asa maozatra itambarany?
Hitanao fa mahavokatra ny tanintsika notrandrahiny
K a aza atsipitsipy, hoy aho, ireto valin-kasasarany.

Etsy ange, ry sombinaiko, holazaiko ho fantatrao,
Tena misy, tsy angano…, misy mihitsy, misy ety..
Any ho any, any ho any… zazakely toa anao,
Noana mafy ka tomàny, mitady vary iray lovia!

Clarisse RATSIFANDRIAMANANA (21-01-74)
--------