Injao tomany ny ao am-poko (Il pleure dans mon cœur, Verlaine) (Heriarilala Andriamamonjy)

Injao tomany ny ao am-poko

Injao tomany ny ao am-poko
Toy ny orana etoana ;
Inona àry ity misoko,
Alahelo toy ny ahoana ?

Ô, ry Feon'ora-mitsitaika
An-tokotany, ambony tafo !
Ny foko tofoka tsy laitra
Ô, ry Kalon'orana tsy miato.

Tomany toa tsy hay fiaviana
Ny foko mihamalefolefo
Moa nivadihan'ilay tiana ? ...
Tsy fantatra ny isaonany eto.

Mangidy indrindra, manaintaina
Ny tsy mahafantatra hoe nahoana
Tsy misy tiana na ankahalaina
Ny foko ange mijaly foana !

Heriarilala Andriamamonjy
10 Oktobra 2026
(Andrana dika teny ny tononkalon'i Verlaine)
--------