Sopatra (Ra'Ony)

Satriko aza iny alina iny, tsy hivadika ho maraina
'zay nanofisako, namihina anao tan-tratrako ry aina
Nanamparako ny fitiavako, ka norohako tsy misy fetra
Kanefa 'lay maraina no nisopatra ka voafetra...

Zarako aza iny alina iny, ho mandava-taona
Ka tsy hisaraka aminao ny foko, fa ho eo anilanao foana
Eny! Amin'ny androm-piainako rehetra
Ho porofo manambara fa 'lay fitiavako anao tsy misy fetra.

Mba satriko aza iny alina iny, hifampizarako aminao
Ka 'zay mba hitako sy hiainako, dia mba hiainanao.
Ka raha tomany aho, eo ianao hamafa ny ranomaso...

Kanefa, lahy! 'lay maraina no nisopatra
Nanidy ny varavaram-poko tsy hipondraka
Ka 'lay fifaliana nataoko hifaharana, lasa ankaso...
--------