Fitiavana (Jeankely Razafimamonjy)

He! ianao ry ilay fitiavana.
Izay mangeja olo-maro,
Mampisaraka amin-kavana ;
Nohon'ny hasarotam-piaro.

Maro no efa lasanao.
Na an-trano na an-dalam-be,
Toa tsy misy avelanao;
Na kely na lehibe.

Toa hananao ny hery ,
Tsy laitran'iza ho ravana .
Ireo mitokan-tena irery,
Vao tratranao toa tamana.

Na lavitra na akaiky ;
Tsy misy tsy mahalala anao,
Ataonao miraikiraiky .
Ka tsy mahavita izay atao.

Tsy misy tsy mitady anao
Raha mbola miaina ihany koa
Izay eo am-pelantananao
Dia mamboraka amin'ny fo.
--------