Herim-pitia (Jeankely Razafimamonjy)

Raha mba tsapanao mantsy
Izany hery ato anaty
Toa voaboraka tsy satry
vonoana nefa toa tsy maty

Izany 'lay herim-pitia
Mampijaly mankahia
Tsy mba laitram-panafody
Fa mampisaina toy ny tody

Toa mampiteniteny foana
mampilatra-dranomaso
Izay atao toa zava-poana
Fa bongo lava izao ny maso

Asa ianao raha toa ahy ?
Mahatsapa izany rehetra izany
Mahatonga sento sy ahiahy
Ka aza sendra azy ihany

Toa tsy resin'iza n'iza
Rehefa sendra miantefa
Na matanjaka ohatran'iza
Tojo azy dia milefa.
--------