Ny ankohonana (Tatamo Ravaky Ny Farihy)

Ny ankohonana

Olon-droa nifampijery,
Nifanantona tsy niery,
Nanaiky ny hiara-dia
Ka hiaraka ho doria

Tafaray ny fo sy ny aina
Saina, vatana, fanahy
Ka niakatra alitara
Izay ho avy tsy hampanahy

Tao ny ngidy sy ny mamy
Fitsapana nahamay
Nefa dia nijoro ihany
Satria io no silaka fanahy

Dia tonga ireo fara sy dimby
Sombiniaina, rehareha
Aro riaka raha te hivily
Mampikambana ny sahy

Ankohonana izany,
Izay no mahalaza azy
Olon-tiana akaiky indrindra
Manohana sy mampirindra

Iriko re ry Tompo tia
Ny hiarovanao anay
Tahio 'zahay hifankatia
Sy ho anilanao doria doria!

Tatamo Ravaky Ny Farihy
--------