DADABE SY NENIBE (Rasamindrakotroka Andry Tiana)

Tena tsaroana ankehitriny,
mitamberina ao an-tsaina,
ohatra ny omaly ny fahiny,
ny raibe sy renibe, lalaina.

Dadabe sy Nenibe nitampify;
eny anelanelany eny,
nanao ho misy ny tsy misy,
ny fisotroan-dronono kely.

Dadabe sy Nenibe, misaotra,
tsy nanadino ireo zafy;
ny fitiavanareo tafahoatra,
niezaka tsy nampihafy.

Ny raibe sy renibe, lazaina;
tia ny zafy noho ny zanany.
Mby miverina ary tantaraina;
nozarainy ny kely nananany.

Tsy ho hadino mihitsy akory,
ireo fotoana lava niarahana,
tamin-kafaliana, na sorisory,
hatramin'ny ora nisarahana.

Tsy lasa lavitra izy ireo akory,
fa ao ambany rangolahy ihany;
tsy mifoha intsony fa matory,
ny fanahiny an’habakabaka any.

RASAMINDRAKOTROKA Andry Tiana
16 Martsa 2021
--------