INY TSIKINAO INY - Rasamindrakotroka Andry Tiana

Azo vakiana?

INY TSIKINAO INY

Iny tsikinao iny, raha vao maraina,
Manintona ny saina.
Raha maso mitopy mifanojo aminy,
Migoka ny maminy.

Iny tsikinao iny, raha sendra tsikariko,
Tonga dia voamariko.
Voatokana ho ahy tontolon'ny andro,
Na alina na antoandro.

Iny tsikinao iny, mandalo sy miserana,
Tsy hita ho ferana.
Tena kanto loatra, mampidoboka ny fo,
Tsy mety simba na lo.

Iny tsikinao iny, niantefa manokana,
Ho an’olon-tokana.
Voaray tsara tsy nisy raraka an-tany,
Satria feno mamy.

Iny tsikinao iny, singa iray tena sarobidy,
Satria lafo vidy.
Mitory aingam-panahy tsy tonta fa vao,
Eny amin'ny endrikao.

Iny tsikinao iny, mifono fitiavana lalina,
Tsy saropatarina.
Tsy atakalo na omena ny olon-drehetra,
Fa efa voafetra.

Iny tsikinao iny, tsiky lalim-paka foana,
Mandavantaona.
Tsikim-pahasambarana ifampizaràna,
Toy ny mana tao Kanana.

RASAMINDRAKOTROKA Andry Tiana
11 Aogositra 2022

Mombamomba

Mpanoratra : Rasamindrakotroka Andry Tiana

Nampiditra : s19andry5851
Daty : 11/08/2022
Mpamangy : 540
Mankafy : 4

Tononkalo hafa

HO FIRENENA SANGANY
MIBANJINA NY HO AVY
LALAN-TSAROTRY NY FIAINANA
HIARAKA ISIKA HISIDINA ANY HO ANY
SAINTSAINO KELY FA ...
NANKAIZA HONO NY OLON-TETY
FITOPOLO TAONA ANDROANY
ZOKY SY ZANDRY
DADABE SY NENIBE
HOY IANAO