NY RAY AMAN-DRENY RAHA MITENY ! (Rasamindrakotroka Andry Tiana)

Nantsain'i jantina
(Nalaina tao amin'ny vetso.serasera.org)
Ny ray aman-dreny raha miteny,
Tsy manery ;
Fa ny hahasoa ny zanany,
Sy ny taranany.

Ny ray aman-dreny raha manoro,
Tsy hanorotoro ;
Fa ny hisoroka ny mety hahazo,
Sy ny tarazo.

Ny ray aman-dreny raha tsy matory,
Be ny sorisory ;
Amin’ny fahasarotan’ny fiainana,
Tsisy itarainana.

Ny ray aman-dreny raha hita kivy,
Toa marikivy ;
Noho ny zava-misy eny rehetra eny,
Manery hiteny.

Ny ray aman-dreny raha malok’endrika,
Toa rendrika ;
Nisy tenin-janaka nandratra ny fony,
Nampalonilony.

Ny ray aman-dreny raha mandefi-dava,
Tsy miloa-bava ;
Hazo amoron-tevana mitaninandro hariva,
Ny fiainany efa hadiva.

RASAMINDRAKOTROKA Andry Tiana
24 Martsa 2023
--------
Rohy:
Sokajy : Fananarana - Fiainana
958 6
Hevitra mandeha
s19andry5851 ( 25/03/2023 04:18)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
s19andry5851 ( 01/04/2023 18:06)
Misaotra betsaka an'ilay nihantsa, ho tahian'ny Tompo !

Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0126