TSY HOE MANGINA IZY ... (Rasamindrakotroka Andry Tiana)

Tsy hoe mangina izy,
dia manaiky ny zava-misy,
heverin’ny sasany ho tsy misy ;
dia ho avela handeha ho azy,
ny fihetsika, fiteny mankanavy.

Tsy hoe mangina izy,
dia midika fa tsisy ny olana,
na efa voavaha ny fatorana ;
ka ho azo atao ny tsy fanao,
amin’izao vaninandro izao.

Tsy hoe mangina izy,
dia tsara, milamina ny fiainany,
tsy misy intsony ny fitarainany ;
mandry fahalemana ny tany,
lavitry ny sento sy ny tomany.

Tsy hoe mangina izy,
dia varimbariana sy resin-tory,
tsy misy intsony ny maha-ory ;
na mandeha ho azy ny fiainana,
tsy miaina am-pitaintainana.

Tsy hoe mangina izy,
lasa vato taingenam-borona,
toa voadona manara-morona ;
na ombin-tsaretin-dRaleva,
voakaravasy sy voatevateva.

Tsy hoe mangina izy,
dia ianao no manana ny rariny,
namidy hatramin’ny tanimbariny ;
fa misy farany ny zavatra rehetra,
ny fiainana an-tany koa misy fetra.

RASAMINDRAKOTROKA Andry Tiana
02 Novambra 2024
--------