MPINO SADASADA (AORN)

Misy mpino sadasada, manantsoratra, hafahafa
Tsy mihambahamba akory, mampiteny ny anarany
Dia mamory filankevitra no sady manatsafa
Ny Mpitondra fivavahana heveriny ho ambaniny

Izy hono matretre, ka mahazo misafidy
'Reo zay olona hitondra sy hitantanana Fiangonana
Ka ny vola no ampiasainy mba ho fanefàna adidy
Zay tsy miditra am'zay, kotabaina sy rahonana

Dia mangina tsy miteny 'reo mpiandraikitra ifotony
Satry moa hahazo kely ka manaraka tsy fidiny
Izy ireo mba nianteherana toa tsy taitra, tsy sarotiny
Ka ny iray fiangonana avy no mizaka izany ngidiny

Rehefa tonga ny alahady, dia tsy maintsy isaina toerana
Ka na hipoka aza ny eo, tsy hipetrahana ny sezany
D’efa mampiteny moana ny vola sy ny fanaperana
Izy no manjaka tokana amy saina sy letrezany

Miambo ery hoe tena Mpino saingy tia manandra-tena
Nefa anaty inoana marina fa tsy vonona hivavaka
Zatra tia mizahozaho, sy manao tsindry hazo lena
Fa raha resaka am-panahy, mitrotrongy anaty lavaka

Misy mpino sadasada, manantsoratra hafahafa
Ka am-bava fotsiny ihany zany hoe mino an’Andriamanitra
Fa ny tena imasoany dia maneso sy mitafa
Lavitra azy aloha hatreto raha ny fanjakan’ny lanitra

AORN
25 NOVAMBRA 2017
--------