Hisy (arcane)

Hisy

Hisy ahiahy hanjaka anao tanteraka
Hibahana ho baraingo, hijadona, hihetraka,
Raha mba fantatrao ny fihetseham-pony
'lay nifanao veloma hifankahita hono...

Hisy ranomaso tsy foy ho tantaraina
Fa mifangaro nofy ny tsiahy tsy voafehy,
Tsy fantatrao niseho na volavolan-tsaina
'lay horoka nanampoka ny resaka mandeha

Hisy andro iray hahatsapanao hirifiry
Hampanontany tena ny anton'ny fisiana,
Nitondranao hiantsy ny lanitra mangiana
'lay hafatra namarana fitiavana mihiry

Fa tsy ho tsapanao raha tsy nijaly ianao
Ny anton'ny tarainako izao hariva izao,
Heverinao kihanta sy sangisangy ihany
Ny endriko manjonitra, ny masoko tomany...
--------