LALA AH! ETSY ANGE HO TANTARAIKO ZAVATRA... (HASINIONY)

Mbola tsisy niantsa

Hangataka antsa
(Nalaina tao amin'ny vetso.serasera.org)
Ny fon'ny poeta, efitra mangina...
tany babangoana mangadihady loatra
tsy misy vohitra ao na toby filasiana
fa lemaka dadasika lalovana hihoatra.
Fanahy sesehena no efa nomba tao:
ny habakaba-manga, ny tany sy forongony
hatramin'ireo tantaran'izao tontolo izao
ny fahatsiarovana aza manko dian'ny tongony!

Ny antsa mihararetra - toa kalo nohirany
tsy feony akory ireny: ny sento, ny toreo
ny poeta tsy misento, ny poeta tsy tomany
fa fiainanao raha sendra nandalo teny ireo.
Ny fon'ny poeta, efitra mangina
ahatazananao mpandalo sesilany
milanja firavoana sy vongam-pahoriana
hataony masom-boly hatrembona any ho any!

Tsinjo tao ny hendry, ny adala, ny mahantra
ny vavaka sy ny ompa, ny sitraka aman-tsiny
ny mpiady sy ny babo, ireo fitia voaratra
tsy nisy tafatoetra fa samy mpivahiny.
Tao no nifanojo ny vatana sy ny aloka
ny lasa sy ny ho avy, ny mamy sy mafaitra
kanjo raikitra ady, nifamely, nifandaroka:
tselatra avy tao ireony hirany manaitra!

Ny fon'ny poeta, efitra mangina
misy ilay diamondra nafenin'andriamanitra
nitady tao ny anjely ka saika tafandriana
raha tsy efa notselarin'ny kotrokiny lanitra.
Io 'lay tonga hira malefaka fa sahy
nanentana ny saina sy fo malai-mihetsika:
tsy feon'ny poeta fa tenin'ny fanahy
manako ety an-tany 'reo mampiretsidretsika...
--------
Rohy:
Sokajy : Aingam-panahy
2505 2
Hevitra mandeha
raozigasy ( 19/08/2013 21:29)
ny fon'ny poeta; harena tsy hita maso
fanahy lafo vidy, tsy hitan'ny malaso
ny olona rehetra maniry mba handroaka
handrombaka tandrify , dia avy eo hitsoaka
.... nefa ...
ny fon'ny poeta,tahiry tsy hita refy
tsiaro migodana, tsy voasakam-pefy
tsy hita holanjaina, tsy hita alaina fatra
enjehin-tsy mitsoaka, mijanona tsy tratra
andry 1000 ( 25/04/2015 08:33)
mahay i hasiniony a! tsy avelany penina tsy hamoaka ny ao anatiny ao ny poeta e? Tsara be
.....................
ny peniko misosa
tsy hay izay hiafarany
fa betsaka miavosa
ny tiany sy hambarany

ito peniko ito
manainga 'zany tanako
mampandrotsirotsy
fanahy izay tena lanaka

satriko anefa,
tsy hijanona eto
ito peniko ito,
hitety vazan-tany;
hanainga ireo tsiahy;
hiaina ny anio
hibanjina ny ho avy...
hjravs ( 25/04/2015 08:35)
Toa niray fanahy tamin'ity tononkalo ity ilay "tontolon'ny Poeta" an'i hjravs, Hasiniony a:
Manorata indray,
dia manorata hatrany
f'izaho mangahiahy
mbola te-hamaky ihany
ny sora-kantonao!
Fa mbola aiza ianao?!
Hametraka hevitra
Midira aloha
Momba ny tononkalo
Mpanoratra : HASINIONY
Nampiditra : hasiniony
Daty : 19/08/2013 16:22
Antsantononkalo

Mbola tsisy niantsa

Hangataka antsa Hampiditra feo
© Eugene Heriniaina - serasera.org 1999 - 2024 - page load 0.0151