TALENTAN’ IRETO POETA (IARANTSOA Mahefa)

Ny talentan’ ireto poeta
novolainy ho soa sy miridra.
Mamelon’ ilay hetaheta
higoga ny tsara indrindra!

Toa ranomahery manonja
Mandrendrika fo ho tamàna.
Angolany tokana monja;
Manainga fanahy tsy ho tana.

Ny hakantony mahasondriana
topazana atao indray mijery.
Fa teboka mila tsindriana
Ilay hevitra tao misitery.

Ny fiainana sy ny tontolony
no akora sy nataony feta.
Toa kanto avokoa izay natolon’
ny tontolon’ ireto poeta.


Ireo no mpiasa nanao fanekena
hitondra ny misy any ho any.
Ho fitaratra iray hijerena
ny toetra sy bikan’ny tany.

IARANTSOA Mahefa 30 10 2019
--------