Ny fitiavana (Joh)

Raha ny fitiavana no tanisaina
De resaka sarotra mahavery saina
Zavatra sarotra tsy azo faritana
Fa miankina betsaka amin'ny vintana

Indraindray mantsy an-taonany maro
Ny olon-droa no mifangaroharo
Nefa misaraka tsy ahoan-tsy ahoana
Ka de very maina sy lany fotoana

Ny sasany indray vao omaly no omaly
No niady be sy nifamaly
Nefa androany eny ambony alitara
No famaranany izany tantara

Tendry sy anjara fa tsy safidy ny atao hoe fitiavana
Izay tianao tsy azo alaina fa nareo hono mpihavana
Lay tsy tianao bika, tsy tianao tarehy tamin'ny fahazazana
No hanjary vady hiara-dalana amin'izay hombàna

Mandinika izany ny manam-pahaizana de vaka ny saina
Ilay olon-tiana sy olo-malala heverina halaina
Voasakatsakana amin'ny zavatra maro ka na mikiry aza
De mifanary eny an-tsasa-dalana fa tsy sahaza

Noho izany de izao no atoroko anao:
Andraso mihitsy ilay feo tokana anatinao ao
Fa izy no hibaiko sy hanoro lalana anao mba hifidy
De hitondra ny mamy ho anao 'lay fitiavana fa tsy mangidy
--------