LAINGA TOKOA ... (Laharthe)

Lainga tokoa raha ny fo no hanadino
Ka hanao toy ny tsisy ny lala-nodiavina,
Lainga tokoa ary toa tsy hampino
Raha toa tsy tsaroana 'lay olo-notiavina.

Lainga tokoa raha tsy misy fitserana
Rehefa mikotroka ny ora-midona,
Lainga tokoa raha ny lasa niserana
No tsy mahamanina ka tsy tsaroana.

Lainga tokoa raha ianao ankehitriny
No tsy mba miherika kely indraindray,
Lainga tokoa raha ny andro fahiny
No navela ho levon'ny mandrakizay!

Lainga tokoa raha lazaina mangidy
Ireny fotoana niarahanao taminy,
Lainga tokoa raha toa tsy hotadidy
Na dia vitsy monja aza ireo ora maminy!

Lainga tokoa raha tsy misy azo ekena
Ny zava-drehetra 'zay efa voambara,
Lainga tokoa raha hoe mora resena
Ny fahatsiarovana manan-tantara!

Laharthe 17-11-17
--------