AZONAO ATAO (LAVENONA)

AZONAO ATAO !

Azonao fehezina ny vavanao tsy hiteny !
Azonao tehirizina izay vita rehetra tany !
fa kosa dia tsarovy sy fantaro ombieny ombieny
hoe ny marina rehetra mbola hiseho indray andro any !

Azonao hafenina ny zavatra efa lasa
ka ho tsiambaratelo ,tsy hisy hahalala !
Fa raha fongarina eto dia angamba fotsiny asa...!
Mangina fotsiny ihany fa izay tena tia adala...!

Azonao kobonina ny am-ponao tsy miloaka !
tsy ambaranao ny hafa, na oviana na oviana !
ka nefa izy ireny dia maintsy mbola hivoaka
miandry ny fotoana hisehoany any aoriana !

Fa raha ny tena tiana ? Tsy tokony hanafenana !
tsy tompon-trano mihono ,na tantara na toetra !
Izy ireny indrindra no hany tokony hitenenana
ireo diarinao fahiny sy ny momba anao rehetra...
fa io no anjaranao !

LAVENONA
--------