NY TIA SY NY TIANA (LAVENONA)

NY TIA SY NY TIANA

Raha ny tia sy ny tiana no hoe tafatambatra
ka mifanaiky fa hiombo-pitia
dia izany no tretrika sy tena sambatra
satria dia fitiavana tena ho doria !

Ka tsy mba lefin'ny taona sy volana
Tsy miofo am-pitoerana fa mihavao
Resim-pitiavana ny ady sy olana dia...
toy izany ry tiako ny fitiavako anao a !

Ny foko dia tokana toy ny an'ny siny
ka tsy mba mahafantatra hafa-tsy rano
Ianao ny ahy no tiako ka aoka tsy ho tsiny
Fa ny ahy ny fitia tsy harira sy angano !

Raha ny tia sy ny tiana no hoe tafahaona
Dia angamba ho feno tokoa ny hafaliana
Fa miandry aloha isika na dia tsindrin-daona fa...
izay maharitra ihany no vadin'andriana !

Ny tia sy ny tiana ? Tsy mifankafoy
Na aza hoe misy ny elanelan-tany
Rehefa mahatsiaro dia ity no vetsoy
fa io mba solon'ny oroka mamy !

Lavenona
--------