NOELY KELINAY (Nic Coper Ofisialy)

Tonga indray ity ilay noely,
Izay voalaza, fa fetin’ny zaza kely,
Mahazo kilalao avokoa ny ankizy,
Ka somebiseby, faly izay tsy izy,

Dia maka, sary miaraka amin’ny dadabe noely,
ary Avy eo miara-mifety, amin’ny dada sy Neny,
Dia misakafo matsiro, sy mahazo vato mamy,
Hafaliana re izao, tsy misy tahak’izany.

Ny ahy kosa, maso manganoano no mijery,
Fa eny amoron-dalana, no miredona tsianjery,
Manantena ireo mpandalo, mba hijanona hijery,
Ka raha toa ka hafapo, dia hanome vola kely,

Mba Hoentina ikarenjy, eny antsena eny,
Hijerena kilalao, izay mba ho azon’ity vola,
Hampifalina tena irery, hifaliana moramora,

Fa i dadabe noely, toa tsy mahita anay kamboty,
Fa amin’ireo misy atao, no mandeha mandrotsirotsy,
Asa, izay mihintsy angamba, no lahatrin’ny fiainana,
Dia ampiononona ny tena, satria mba iza no hitarainana,

Dia ny tsiky an-tavan’ny hafa, no hakana maminy ny fety,
Fa ianao mahantra sy kamboty, efa naman’izay resy,
Mofo gasy sy ambin-kanina, no ankafizina, akesoka,
Ary isaorana an’ny Tompo, fa tsy mba raisina ho lesoka,

Dia mifampiarahaba, mifanome tso-drano,
Mifampitsiky kely, dia adino ny amoamo,
Satria andro iray, miavaka amin’ny maro,
Ilay noely kely, fety mamy, tsy atakalo,

tonga indray ity, ilay noely soa,
izay isan-taona izao, dia endrasana tokoa,
tsy andry mihintsy ery, ilay andro tokana io,
hifaliana sy hiobiana, amin’ny fo madio,

dia miarahaba antsika indray, amin’ity noely ity,
samy ho tahin’ny tompo, ary samy hankafy,
fa ny anay kamboty kely moa, efa toy ny maha zatra,
Mifaly kely indray andro, dia izay no izy, samy rava…

Dia Miandry ny noely, amin’ny taona ho avy indray,
hiobina sy hifaliana, andro iray indray mipika,
hanantenana fiovana, sy valim-bavaka amin’ny ray,
mba hiara-hifaly, sy hifampiarahaba indray isika…
--------