ANGAMBA SAMBATRA IZY (Njakahery ANDRIAMALALA)

ANGAMBA SAMBATRA IZY

Angamba sambatra izy,
Fa toa tsy reko intsony ilay taraina mahonena
raha vao maraina iny,
Ilay tavany efa kotsa, manjombona mahatsiaro ny lasa vao tsy ela

Fa angamba mety sambatra izy
Ny talahony aminao, iny ranomasony iny, ilay nandritsoka ny fony
Tsy mba reko eto intsony,
Angamba any ho any, mety sambatra izy izay

Fa na andro na alina izy reko teto foana,
Maniry mafy anao kanjo indrisy zava-poana
Fa tsy mba maty tao ampony anie izany lasa izany
Angamba sambatra izy izay fa niampita any ho any

Fa fony izy teto,
Tsisy hany zavatra hafa f’ianao foana no tsaroany
Anatiny any mitaraina, kanefa indrisy mantsy,
Fa ianao anie tsy mba foiny,
Fa dia tazako eto foana rehefa iny izy no irery sy koa manganohano
Fa ny teninao farany hoe “mandehana rahavako fa tsara tso-drano”

Fa angamba sambatra izy izay,
Fa nangina toa tsy nisy, ilay izy nitalaho
Ny hiverenanao fa e! toa tsahotsaho
Tara loatra angamba ianao
Fa angamba , efa sambatra izy

Njakahery ANDRIAMALALA
--------