FITIA DISO FIANTEFA (Riantsoa)

azon'ody tany angamba
no niraparapa foana
sa ny maso no efa jamba
sa ny saina no nivoana?

bika ve no hany bala
vola no atao mpitondra
entinao hanjono kala
any ambadiky sahondra

tara loatra ianao ry Zandry
kely loha toa an'i Kaina
atao inona ny sandry
raha tsy miaraka amin'ny saina?

izao ny aina efa very
ny havendranana nibary
ny hanohanana mamely
ny fanahy mararirary

aza tia manendy loza
lahy tokana ny aina
trondo kely an-tanam-poza
raha tsy maty, kilemaina

raiso ho anatra iny anefa
fa raha manindroa tsy laitra
fitia diso fiantefa
miantsampy amin'ny koaitra
--------