IZA NO HANOHITRA (NY Andri-Fara)

IZA NO HANOHITRA

Vanin'andro mampatahotra
Fotoana mampisaratsaraka ;
Ny tonon'andro tahaka izao ,
tsy afaka ny hitambatra...,
Iadiana mantsy ny fiainana .

Ny hafa varina nanao fanenjika ,
Ilay henjehina tsy azo...,
Ianao indray no fanina !
Korotanin'ny adim-piainana .

Manahy aho fa diso fahavalo ,
Ka mifandramatra hifamono ,
Avy eo vao samy Gaga ...;
Hifanontany tena...,
Iza no omena tsiny ?

Nefa izaho no diso fahavalo !?
Izay rehetra atao hifanomezan-tsiny
Tsy ahitana vahaolana fa nametrak'olana ,
Famafazan-dainga hitolomana...,
Hay ny seza no tambim-pamonoan'olona .

Ianao nitolona , niaritra tsy nisy...,
Nisy saingy tsy natao ho anao.
Ireo harena ambanin'ny tany...;
Sy izay rehetra hitanao ! tsy anao ?!
Tsy higoka izany mihitsy raha isika ,
Fakofakon-kanina raha hisy izany .

Izay vao fantatro ...ny fisiako ho azy
Ny fisianao hanantsenany ny banga .
Tsy natao ho an'ireo mandady harona ...,
Ireo harena nomen-Janahary ho an'ny vahoakany .

Diso fahavalo isika
Isika indray no mifanohitra
Ny hafa mitsetsitra ny harenanao
Isika miady lava tsy nisy fiafarana ,
Tsy aleo ve faranana...Antsika anie ity tany ity e .

Ampy izay ilay fotoana lava
Nitolomana ny fahafahana
Hialana amin'ireo ziogam-pamoretana !?
Ka ny tsara mba naondrana navadika ho ratsy
Ireny no hivelomana , fa ny ahy tsy hita ho nanjary .



Ampandrianomby . 21 Febroary 2025
--------