Dikasoratra (Ny Hafatra RANDRIANTIANA)

DIKASORATRA

Poeta dia ilay olona mitafy nofo sy rà,
Tsy lafatra akory;
Fa hay misy tovon'ny fanahy,
Ka afaka mitony.

Poeta ilay anjely,
Misikina nofo;
Heriny ao anatin'ny teny,
Ampitafiany loko.

Poeta dia mpaminany,
Afaka amaly akamantatra tsy takatry ny saina;
Izy dia Andriamanitra mpiahy,
Afaka mamoha sy mitory,
Fa tsara ilay mpamboatra.

Poeta,
Dia olona tsotra fiaina toy ny rehetra ;
Ny talenta sy rijam-panahy no anavahana,
Fa olona miavaka izany vita dikasoratra.

Koa aoka hitsahatra hatreto ireo fanokajiana,
Sy fanitarana hoso-bovoka anarana.

Ndeha hasiana lalàna,
Fa ny poeta dia tokony harovana,
Hitodihana amim-panajana,
Sy hamantarana azy etý ivoho.

Mbola tsy hary akory ny vanin'andro anio,
No efa naminany ny fiainako ianao poeta;
Voasoratrao hatramin'ny làlana sy ny kiho
Ary ny firafiny rehetra.

Ny Hafatra Randriantiana, 05/07/22
--------