MAMBA NOANA (Ny Hafatra RANDRIANTIANA)

Mamba noana

Hitako ho tsara fianjaika ianao ry zandry
Amin'ity moron'ny ny rano filalaovana ;
Etsy anefa misy ny efa manasahasa vangy,
Miandry faingonao mihantona.

Eto misy mamba noana miriaria
Mitady izay hororitina;
Dia tazàno itsy koa ilay dengin'ny farihy
Handetehana haza voasambotra.

Iretsy antaranoana mitety moron'ny fandalovana
Hamotraka sy handavo no kendreny ;
Hampandamaka anao am-pandriana
Hitetika ny hihinana ny nofonao malemy.

Ireny efa tompon-daka raha hamandrika sy handango,
Manaova soa ianao famindra tsy ho lavo;
Ireny efa fahavalo,
Ka mahaiza ianao mianko.

Raha ianao tratrany soa amin'ity haratony,
Dia tazàno irony dobo irony ;
Fa ho eny ny vatanao hivalampatra
Hihazo ny lalina ambany,
Ny rànao hanova lokon'ny rano.

Tandremo ry zandry!
Voay noana izato mipelipelika;
Mandrangi-kihy izy irony miandry,
Mandamina tetika hihinana ny nofonao sendra roboka.

Tsy mampatahotra aho tsy akory,
F'izaho mba manafatra;
Izaho no zoky
Miteny sao ianao ho isan'ny rakotra.

Ny nenina tsy mba namana malala ah!
Fa fahavalo hitrongy ny ratranao;
Ianao mitoky amin'ny rahona mihevaheva
Dia ho ratsy fiafara ny tantaranao.

Tandremo ny lalao amoron-drano,
Fa ireny voay ireny anie ka mipelipelika e!
Efa miomana izy handrombaka ny hatsaranao mandalo,
Sy handratra ny fonao marefo.

Ny Hafatra Randriantiana, 24 Novambra 2022
--------