Manina anao (Ny Hafatra RANDRIANTIANA)

Manina anao

Raha lavi-tany misy,
Ity nandao tsy satry
Injay fa mahatadidy
Iny làlana tanaty diary

Injay fa misonenika ireo tsiaro
Mianika hati-doha mangina
Manembona tsy miato
Manina malala tiana.

Rehefa isika iny takariva mena masoandro
Nampirampiran-tsoroka teny amorom-parihy
Sangisangy teny amoron-drano
Sy niara-nakanaka felan-tatamo.

Raha lavi-tany misy
Ity nandao tsy satry
Dia mety hitanisa tsiaro vitsivitsy
Izay niarahana tany

Manina anao aho lalaina a
Te hampirehitra ilo
Kanefa,ho avy io ihany ilay maraina
Ka aza mba manadino.

Ny Hafatra Randriantiana, 31 Martsa 2022
--------