An-taratasy sy an-dovia (Ny Kanto)

‘Raha tsy ho avy hono ianao
Dia aleo ajanona hatreo;
Ela loatra izay niandrasany izay.
Dia nampiany koa hoe leo,
Tsy tiany intsony ianao’
Dia hoy ianao hoe :

Ny tiako tsy tia ahy
Ary tena mampanahy,
Toa manao an-katerena
Sy mitamby volamena

‘Tonga ihany anefa ianao,
Sahy nangataka ny tànany.
Tena tia ka dia niroboka,
Ny fitiavany hilalao.
Ny fonao ihany no nidoboka,
Ny azy faly fa nandrombaka !’
Dia tsy fantatrao fa :

Ilay ‘eny’ tena izy
Nataonao sarobidy
No hifampizara lapa
Amin’ny azy ‘(t)eny’ fitaka

‘Dia tsarovinao koa ilay volan-tantely
Alina hafa kely, tsy mamy toa tantely
Izay namakiany ireo adidy,
Tsy nasiany andraso andraso
‘Lay nanaovanao sonia teo ampahibe-maso
Nanasanao havana, s’ireo sakaiza tia.’
Izao vao gaga ianao satria:

Fa ny azy tsy fitia,
Fa ny azy hay sonia,
Fa ny azy tsy fitia
Fa ny azy hay voarakitra,
An-taratasy sy an-dovia!

Ny Kanto. Parisy 2004-09-17
--------