Moa va tsy fantatrao ? (Ny Kanto)

Mbola tsisy niantsa

Hangataka antsa
(Nalaina tao amin'ny vetso.serasera.org)
Moa va tsy fantatrao ?

Fa kanto anie ilay teny izay toa navela hihafy
Am-po sy saina irery, voagejan-teny hafa
Mihamihanaka mandrafy

Moa va tsy fantatrao ?

F’ireo faka nipoirana sy tanjona kinendry
Ny lasa, anio sy ny hoavy ; ny anjara sy ny tendry
No miara-asandratry ny teny

Moa va tsy fantatrao ?

Fa vahatra hampiria ilay maha-ianao anao,
Hahatonga ny hafa hitia hatramin’ny taninao
Ny tenindrazanao

Moa va tsy fantatrao ?

Fa sarotra afenina na dia inian-kosehina
Ilay antson-teny anaty, antso tsy ho farina
Ho anao mba tsy ho nenina

Moa va tsy fantatrao ?

F’efa maro manarivo, ireo teny zary moana
Very an’efitry ny lasa, am-boky babangoana
Am-ponjan’ny fotoana

Moa va tsy fantatrao ?
F’ianao io indrindra no mpampita sarobidy
Ilay tenin-dreny omena, tsy mba novinidy
Lova sy tahiry

Moa va tsy fantatrao ?

Fa raha ianao no tsy hihira, raha ianao no tsy hiteny
Ireo hainteny soa mihanta sy milanto
Dia ianao no antsoina hoe „Mpandevim-belona ny kanto”

Moa va tsy fantatrao ?

Ny Kanto. Parisy, jona
--------
Rohy:
Sokajy : Kolontsaina
1719 0
Hametraka hevitra
Midira aloha
Momba ny tononkalo
Mpanoratra : Ny Kanto
Nampiditra : NyKanto
Daty : 12/06/2006 09:51
Antsantononkalo

Mbola tsisy niantsa

Hangataka antsa Hampiditra feo
© Eugene Heriniaina - serasera.org 1999 - 2024 - page load 2.007