Reny malahelo... (Ny Kanto)

Lafi-valon’ny tontolo miha-feno tebiteby
Tabataba, jaly, hiakan’antso misomedika
Ireo reny malahelo nilaozan’ireo zanany,
Midradradradra, mampikija ny tomaniny.

Fa dia nankaiza ireo anjely mpiaro?
No ain’ireo tsy manan-tsiny maro
No novonoina ho fitakiana fahaleovan-tena,
Norobaina sy natao an-katerena !

Mbola hisy ve ny fiadanana?
Aorian’ny fandripahana
Matahotra aho fa sao indrisy
Ny ra asolo ra, nify asolo nify
No haka laka tsy hidify,
Ary tena hivalampatra mihintsy.
Fa ho tena sarotra ny hamela,
Sy hanadino ho an’ireo tavela.

Ny Kanto. Fahatsiarovana ireo zaza maty tany Ossetie. Septambra 2004.
--------