Kiady - SARONDRAHONA RAMBOLAMANANA

Azo vakiana?

KIADY


Na iza hisahotaka, na inona hipoaka
Dia aoka aloha ho tony ny fihetsikao vahoaka
Aty am –piandohàna
Fa raha mirafarafa anaty tsilo ianao
Dia tadidio tsara
Fa tsy maintsy  hazeran’ny lalana malama !


Ianao tsy mahalala fa ny olona  efa niomana
Nefa ianao indray tsy miandry hanatonana
Fa tonga dia mivoaka;
Farany hifandiso tsy fantatrao intsony
Izay tokony hapoaka
Fa ho triatra ny vilany, ho potika ny sarony !


Mandalo eny ianao: mamofompofom –banja,
Tsy fantatrao intsony… fa tototra ny kianja
Manaizanaizan’ady
Dia iny koa ianao  miroso an –tsitra –po
Tsy nanan-tsiny akory,
Kanjo vetivety dia potraka sahady !


Tonia ianao vahoaka dia mandamina saina
Fa mbola  izany  aloha no tolona ilaina
Hatsangana ho kiady !
Fa ho avy ny fotoana tena ilàna anao
Ka meteza  ho  tony !
“Ny fahaizana mandamina no entinao miady !



SARONDRAHONA RAMBOLAMANANA ( 033 14 253 57)
DO.COM.CYBER Ankadifotsy, 16 Jona 2004
Faribolana SANDRATRA Antananarivo

Mombamomba

Mpanoratra : SARONDRAHONA RAMBOLAMANANA

Nampiditra : sarondrahona
Daty : 16/06/2004
Mpamangy : 1029
Mankafy : 2

Tononkalo hafa

TSY TONGA VOLANA
SOAMAHAMANINA
MIASA ALINA
HAZONOELY 2012
VITSY
HOY IZY ANONA
AOKA ALOHA
FAMERINY
SETRINY ( Valin'ny HAFATR° i R A D O)
MIANDRY