ANTEMA (Skual)

ANTEMA


Fialan-tsasatra tamin’izay
Ka niala sasatra tokoa
Ho an’ny Nosy be indray
Handeha hamangy an-dry totoa
Hafaliana ny an’ny zandry
Ny an’ny zoky koa tsy tana
Samy efa mandrimandry
Miandry ny ora hiaingana


Saingy izaho miteny kosa
Tsy nahitana tsiky firy
Malaindaina, osaosa
Tsy te handao an’I Faniry
I Finiry dia fitiavako
Izaho koa tsy atakalony
Fa ny tsikiny firavako
Ny alaheloko fahavalony


Ndry… ity izy mipitrapitra
Nanatitra anay teny Ivato
“tandremo ianao sao maditra”
Manafatrafatra tsy miato
Ny hisara-toerana aminay
Toa tsy mba fahazarana
F’efa zatra ny hatrizay
Mifampitsena any am-pianarana


Nipaiko ny ora fiaingàna
Teo izahay vao samy taitra
Nifamihina mazàna
Ny alahelo koa tsy laitra
Indrisy mantsy aky ry neny!
Izaho tsy manana safidy
Raha mijanona aho voateny
Ny tapakila efa voavidy


Toky no omeko
“izaho tsy hamadika anao izany”
Tena hianianako eto
Ami’ny lanitra sy tany
Izy tsy niloam-peo
Fa namihina ahy indray
Norohany aho avy eo
Dia samy lasa izahay


Sambany aho tami’ny fiainako
No nandeha fiaramanidina
Lasa sahady ny fisainako
Te hitsambikina, te hidina
Hamonjy an’I Faniry
Ilay manjakeliko iny!
Manaikitra ny hirifiry
Fa tsy eto ianao ankehitriny




Ora vitsy monja
Dia tonga izahay
Ireto mpihavana mafonja
No indro tafaray
Hafalian’ny mpianakavy
No niseho teo an-tseranana
Miandahy, miambavy
Sangisangy tsy hay faranana


Saingy izaho izay manoratra
Tsy dia nahita fy
Manafina ilay olatra
Miatsaravelatsihy
Ny arahaba ihany no ela
Dia natsoiko I Faniry
Nibadabada ery ny lela
“tiako ianao” impiry impiry





Efa ho herinandro mahery
No niainako an’I Nosy be
Tsy lazaina hoe irery
Fa misy akama be dia be
Maraina izahay mijery tany
Ny atoandro kosa milomano
Ny atoandro any amoron-dranomasina any
Alina vao mody an-trano


Mety hieritreritra ianao
hoe adinoko Faniry?
Tsia, tsia tsotra izao
Fa vao mainka mankadiry
Ny fifankatiavanay
Milanja ho aman-taonina
Tsy mitsaha-mifandray
Mifandray an-telefaonina
Lazaiko azy avokoa
Izay alehako rehetra
Izy moa dia tso-po
Ka sanatria rah any hamepetra
Fa anatra no omeny
“tandremo fotsiny maditra a!”
Ny valin-teniko dia eny
Ho eny foana isa-minitra



Nisy kosa andro iray izay
tsy fantatro hoe nahoana
tamin’izay fotoana izay
aho nalahelo azy foana
Ny fodiana toa tsy ho andriko
Ny alahelo toa tsy ho sitrana
Mahery be ny tsindrimandriko
Tsindrimandry tsy hay faritana


Raha izaho mbola variana
Lasa am-borona iny indrindra
No nanaitra ahy I Diana
Zanaky nenitoa Narindra
Sabotsy ny andro hoy izy
“andao rahariva hanala azy”
Hiaraka amin’ireo ankizy
Any Andilana “plage”


Tsy nisalasalako akory
Ny nanaiky izany heviny
Mba hanalako sorisory
Dia narahiko ny reviny
Natsoiko aloha ilay manjakeliko
“mba avelao aky izaho handeha a!”
Eny hoy izy ry anjeliko
fa tandremo mamo be.





Hariva tokoa ny andro
Tafahaona ny mpinamana
Ny baliakan’ny masoandro
Lasa diavolam-penomanana
Izany hatsaran’ilay toerana!
Tomefy olo-mikoràna
Ny zava-pisotro koa tsy ferana
Na mangatsiaka na mafàna

Manentoento masikita
Izay rehetra aleha
Ny akoho moa efa vita
Mendimendy tsara be!
Mba naka toerana izahay
Naka vera ihany koa
Izaho irery moa no iray
Fa ry zareo tsiroaroa


Nony niakatrakatra ny toakan-dry zalahy!
Ny sasany mandihy, ny sasany misangy!
Nanomboka irery aho, toa mijery “cinema”
Nitanàka teo izahay sy ny tavoahangy
Nalahelo mafy tao am-poko tsy miloaka
Ny tsiaro an’I Faniry no indro indray mandona
Nohaniko ny tsaky, nogohako ny toaka!
Ilay hafatrafany iny nohiniko nohadinoina


Dia iny koa fa niakatra
Ka niakatra ny daoziko
Tsy tiako hisy hahafantatra
Hoe mamo anie ny paoziko
Kinanjo nony avy eo
Tsy ampy roa minitra akory
Teo ambony seza teo
aho dia efa raiki-tory


Vetivety monja dia tapaka ny nofiko
Misy olona mikitika avy ao aorinako ao!
Henoko mibitsika mangina anaty sofiko
“Mba afaka mipetraka eto akaikinao ve aho?”
Ohatran’ny tsy teo aho dia niarina avy hatrany
Nitodika ankavia, nijery ny ankavanako!
Tovovavy iray mitsikitsiky no indro tamy
Tsy nisalasala namihina ny tanako



“Antema no anarako” hoy izy am-pitsikiana
Ny ahy kosa tsy nambarako, teo indray aho dia variana
Zana-javatra izy izany! Mandina ery ny molony
Ity fijeriny mankany e! voaravaky ny volony
“Antema ho any anarako
ary ianao variana be a!”
Azafady hoy aho fa tsy arako
sady mody niomehy




Fa inona loatra ary no ao anaty lohany?
Sa…mpivarotena?
Toa izy indray no mampiresaka ahy voalohany!
Teo indray aho nihenahena
Nisalasala be ny saiko
Ny bandy miantso azy tsy misy rarahiany
Fa laozany misisika manontany izay ilaiko
Fa hoe hovidiany



“Fa maninona ary ianao? Ianao angaha mbola mamo?”
Hoy indray izy nikiry nanontany
“Misava eo foana io fa avia aho aloha tantano
Dia andao isika handihy amin’izany hira izany”
“Antema a! avelao, hoy aho nisalasala
Somary tezitezitra, somary nisafoaka
“Mitadiava olon-kafa fa izaho tsy misy drala”
Vao naheno izany izy dia nirintona novoaka


Teo aho vao tonga saina
Tamin’ny vava izay navoakako
Tsy fahaizana miaina
No nafitsoky ny toakako
Nalaiko ny finday
Asa izay na amin’ny firy?
Antso sivy tsy voaray
Hay niantso teo Faniry


Tsy reko noho ny fiainako matsiron’ny “plage”
Tsy reko noho I Antema sy ny toaka be dia be
Soratra mivandravandra no tao anatin’ny “message”
« Ianao tsy mandray antso anefa izaho « ilimité »
Raha mba fantatrao ry tiako
Hoy aho velon-tsento!
“ssh: Faniry indray tsy ho ariako
Fa Antema izao no eto”



Tsy fantatro hoe nahoana
Aho no niteny toy izany
Ireo fakam-panahy izay nanoloana
Toa mba aritro ihany
Tamin’ity kosa aho tsy tody
Fa dia ketraka sy very
Izany ve no azon’ody
Sa ny saiko no efa tery?



Izany rehetra izany no niodina tao an-dohako
Ireo namako rehetra aza tsy hitako intsony
Tsy norarahiako fa Antema no karohako
Fa azony ny foko dia alaiko koa ny fony
Nikaroka aho tsy niato, efa reraka sy serana
Nankaiza ary izy teo?
Jereko iry ambony vato, miala kelin’ilay toerana
Io Antema mitoreo


Vao nahita ahy izy dia vao mainka nitomany
“Dia mpivarotena ve no heveranao ny tenako?”
“Aoka izay Antema a! avelao izany ho any
Tonga eto aho hifona fa tena nanenenako”
Vetivety teo dia nitony ny hatezerany
Nibanjina ny masoko efa ho segondra maro
Tety an-tsoroko ny tanany no nazerany
Nifamihina izahay, ny tohiny? Fantaro



Tsy haiko hoe ahoana no ilazako aminao
Ny hatsaran’ny molotro nikasika ny molony
Ny rivo-dranomasina misosa no injao
manome aina mampikopaka ny volony
henoiko ao am-paosiko misy zavatra maneno
I Faniry izany… teo aho nitebiteby
Notapahako haingana dieny mbola tsy heno
Tapaka ilay oroka, “Faniry koa mandrebireby”



Vita izany rehetra izany, izaho nikasa ny hiverina
Ho any amin’ilay fety izay mbola be mpivory
Izy indray nisisika ny hody sy aterina
Fa hoe mangatsiaka sady efa te hatory
“Izaho anie vahiny e! ahoana izaho raha very?”
Hoy aho somary taitra ny amin’ity hanatitra azy
“Any amiko matory sady izaho mipetra-drery”
Hoy izy amin’ny endrika tsy mivazivazy



Teo indray aho dia variana sy nandalina
Nojereko ny amboniny, nodinihiko ny ambaniny
Tena hisy azy ny anay anio alina
Nekeko avy hatrany fa tsy nilako vaniny
Teny an-dalana I Faniry tsy nitsahatra nikaika
Ohatran’ny henon’I Antema fa modiany fanina
Novonoiko ny findaiko fa sao vao mainka
Henony eo tokoa ka hanimba ny planina


Teo ihany koa vao fantany ny anarako
Nolazaiko azy hatramin’ny sakafo tena mamiko
Nosokiriny ka mihafantany ny tantarako
Saingy ny azy kosa vao mainka maizina amiko
Izy rehefa manontany tsy laitranao ankisoka
Anefa rehefa anontaniana mamaly boribory
Misy zavatra afeniny tsy haiku manampitsoka
Toa tsy takatry ny saiko dinihina akory!


“Antema a! ianao ve tena tia ahy tokoa?
Eny hoy izy sady mbola nanamafy
fa izaho hono mitovy amin’ny sipany taloha
Na amin’ny fomba fiteny, na amin’ny fomba fitafy
“Dia aiza izy izao? Nahoana no nisaraka?”
Hoy indray aho mody namazivazy
“Tsy maintsy misaraka rehefa tsy mifanaraka
Nampirafy ahy dia novitaiko ny momba azy”


- “Novitainao ahoana?” hoy aho niahotrahotra!
Vonoiny aty aho izany raha fantany Faniry

Sangisangy re izany e! ianao ity sarotahotra a!
Eo dia mahamahana eo fa mampirafy firy?

Tsy mampirafy aho ka! Ny ahy ianao ihany
Hoy aho nampandry adrisa tamin’ny feo miakanakana

Misaotra aky malala a! raha mbola eto an-tany
Ny amitsika hoy izy tsy avelako hisy hanakana


Izany rehetra izany no santionan-dresakay
Namantona alina iny, tsilovin-diavolana
Ny lalana amin’izany tsy fahitako hatrizay
Sady be alaala no mbola miolakolana

“Antema a! ianao ve tsy matahotra amin’ity lalana ity?
Raha izao no misy mpanendaka na mpamosavy!”

“Tsia! Ny faty tsy mahery noho ny fitia
Ary aza rain’ny tetaka fa ianao ve sarim-bavy e?


Tonga ihany izahay
rehefa ela nandehanana
trano fotsy be iray
no indro nivantanana
“Mandrosoa aty an-trano
Tonga soa ato aminay”
Vao niditra aho dia nomeny rano
Samy reraka izahay!
Tsara be ilay trano fa somary maimbo lao
Kanefa mba madio sy milamina ery
“ Fa aiza kay ny dadanao sy mamanao
No hoe ianao irery no mipetraka amin’ity?”
Ireo fanontaniako
tsy novaliany akory
nendahiny ny fitafiako
nosintoniny aho hatory



Mino aho fa azonao an-tsaina
Ny zavatra nitranga
Ny azoko lazaina
Dia ny lanitra no manga
Mangiran-dratsy aho vao niesona
Sady valaka tokoa
Tena nahazo lesona
Tamin’ilay Antema soa


Naheno nangatsiaka aho vao nahatsiaro tena
Ny masoko amin’io mbola tsy mihiratra ihany
Notsapaiko teo akaikiko fa tsy teo intsony Antema
Ny kidoro natoriako aza lasa mafy toy ny tany
Ahoana ary izy izany? Sa nanonofy aho ve?
Tena sarotra takarina, tsy hay voaboasana
Nosokafiko ny masoko hay efa mazava be
Io ny akanjoko mihantona amin’ny lakroam-pasana


Teo aho vao tonga saina
Fa lolo kay I Antema
Nivoraka, nangaina
Toa nidirana kilema
Tena loza ity rangahy!
Loza iray, loza folo
Ny manodidina ahy
Feno fasana daholo


Nanaovako ny akanjoko
Dia lasa aho nandeha
Nanaintaina be ny ranjoko
Vao nahita arabe
Saika hiantso aho avy eo
Hay ny findaiko aza very
Nolatsain’ny nenina aho teo
Vaky feo niteny irery


Findain’olona nindramiko
No niantsoako an’ny zandriko
Hoe aza miasa saina ny amiko
F’efa nody aho fa tsy andriko
Teo koa ny hevitro no nitsiry
Mba hampitony ny hakiviany
Dia hotampohiko I Faniry
Amin’ny fahatongavan’ity tiany


Soa fa sendra olo-tsara
Sendra olo-panarivo
Fa nanaraka fiara
aho dia tonga teto Iarivo
Alina no nahatongavako
Ka tsy andry ny maraina
Hiaonako amin’ilay fitiavako
Ilay Faniriko misaina


Marainan’ny alahady
Dia niarina ny tena
Efa vonona sahady
Miaraka amin’ny raozy mena
novidiako tamin’ny rakitra
tokony ho an’ny fiangonana
Fa alohan’ny fanatitra
Dia Faniry aloha no hifonana


Izaho tsy niditra avy hatrany
Fa nanao ilay sioka famantarana
Niandry teo, ka niandry ihany
Tsy nivoha ny varavarana
Inty ny reniny fa tamy
Nanantona ahy,nidiridiry
Avy eo niondrika tomany
Fa hoe marary be I Faniry


Tsy nino aho raha tsy nahita
He! Ity tendany feno mangana
Nokendain’ny olon-tsy hita
Malemy tsy afa-mitsangana
Indrisy mantsy aky Faniry!
Fa takaitra no nasesikok
Ilay fitiavanao nikiry
Sy nandresy izay tsy resiko


Vao mikasika azy aho
Mibitaka izy, miantso vonjeo!
“aoka re e! avelao
Avelao aho fa matiny eo”
Ilay tenin’I Antema tamin’izay
No tadidiko avy hatrany
Hoe tsy hisy hahasaraka anay
Raha mbola eto an-tany



Notantaraiko tamin’ny reniny
Ny tsiambaratelo saika hotanako
Misaraha hoy ny teniny
Sao ianao hamono an-janako
Mafy taminay ny hanaraka
Ity zavatra eritreretiny
Kanefa izahay vao nisaraka dia sitrana ny aretiny



Izay niaraka tamiko taty aoriana
Tsy nisy mba naharitra ela
Fa iharan’ny habibiana
Ataon’I Antema tsy afa-bela
Nony farany aho nivonona
Hizaka ny ratsy vitako
Ny fahendrena dia ny mionona
Antema marina no sipako.


Skual 04 Mars 2013
--------