You are here: home > Vetso

Raha mivavaka ianareo - Skual

Azo vakiana?

Raha mivavaka ianareo
dia manaova hoe :
Rainay any an-danitra


Izany lanitra ry Ray o!
mbola iry ambony iry
mbola heveriko indraindray
hoe tsy hitanao izay ataoko ety
Ny foko re no amboary
ho lanitra hitoeranao
koa mandrosoa ary
fa ao no fiandriananao


Raha mivavaka ianareo
aza toy ny fariseo
sy mpanora-dalàna
izay tia misehoseho
sy mivavaka ankalamanjàna


Ato an'efitranoko ato
inty aho Raiko mandon-tratra
mivavaka  tsy miato
ho an'i Dago izay maratra
Efa-taona izay no vita
nasafoton'ny tadio
hatram'izao mbola miampita
amin'io tetezana io


Raha mivavaka ianareo
manaova toy ilay mpitondratena
nivazizotra, tsy leo
nangataka izy dia nomena
Izaho koa Tompo o! mitalaho
ny fireneko anie ka ory e!
ny gadrany vahao
Tsy maty io angamba fa matory e?


SKUAL

Sokajy : Vavaka

Hevitra mandeha

Zozoro (17/09/2013 19:17:37)

Mahay ny mpanoratra. Misaotra nizara e!


kiriah (21/09/2013 13:27:57)

TIKO ZANDRY KELY A !!!