Ratra (Skual)

Mety ho gaga angamba ianao
raha toa ka tafa an-taratasy
no alefako any izao.
F'izay vaovao ambarako eto
dia alahelo feno sento
ka tsy ho vitako akory
ny hilaza sy hitory
mivantana aminao
izao ratram-poko izao.

Diso tia anao ny foko
ka na inona adintsika
dia nekeko ho hadisoako
Tsy tiako ho rava sy hangatsiaka ilay fifankatiavantsika.
Anefa kosa ankehitriny
tsy ho toa ny faniriako
f'efa iny olona iny
no namafanao ny fisiako.

Mangovitra ny tanako
hanoratra ity teny ity
anefa tsy afaka sakanako
satria voadonan'ny fitia
Tena tiako ianao f'indrisy
tsy maintsy hofaranana
efa izao ny zava-misy
aleo mifampikopa-tanana

Izaho tsy mila ady
na...hamaly faty sanatria!
Fa mampatsiahy anao sahady
misy tody ny fitia
Tsy faniriako akory izany
tso-drano no afafiko
Fiadanana tsy lany
ho aminao sy ho an'ny rafiko.

Mety ho gaga ianao raha vao nitopy
ka taratasy mandomando
no tao anatin'ilay valopy!
Ireny no dian-dranomaso
izay nateraky ny ankaso,
sy porofo mba nindramiko
fa tsy moramora tamiko
ny tsy hitia anao intsony
Homba anao anie ny ao ambony.
Aza valiana
--------