Tongava saina (Skual)

Mbola tsisy niantsa

Hangataka antsa
(Nalaina tao amin'ny vetso.serasera.org)
Afak'omaly ianao solafaka
Omaly lavo,niosim-potaka
Izao mianjera,mbola tsy afaka!
Dia rahampitso koa ho trotraka?

Impiry mo ianao no leo
sy niandrandra fanovàna?
Fa nararaotin-dry zareo
nangalàna fitondràna

Ny fahaizany miteny
sy mandahatra kabary
no nanaovanao hoe "eny"
ka jereo ny vokany ary

Ny rà nalatsakao tsy fidiny
sarobidy sady ngeza!
Dia nanjary tsisy vidiny
f'efa azony ny seza

Isika samy isika
no miady tsisy fandeferana
f'ireo mpanao pôlitika
mahay mifampizara toerana

Be ireo fampanantenàna
saingy rano raraka an-tany
Tsy mbola misy fiovàna
fa ny omaly no androany

Miantso indray izao ny mpanohitra
Ianao no mody omeny lanja
Dia tarihiny hanani-bohitra
sy hitokona eny an-kianja

Asa ianao raha hahatsapa!
Asa ianao raha efa fay!
Sa...mbola ho entiny eny an-dapa
mba ho alatsa-drà indray?

Juillet 2011
--------
Rohy:
Sokajy : Politika - Tanindrazana
1011 0
Hametraka hevitra
Midira aloha
Momba ny tononkalo
Mpanoratra : Skual
Nampiditra : Skual.R
Daty : 12/06/2013 07:39
Antsantononkalo

Mbola tsisy niantsa

Hangataka antsa Hampiditra feo
© Eugene Heriniaina - serasera.org 1999 - 2024 - page load 0.0101