Hatoky (Solo)

HATOKY AZY TANTERAKA AHO (Hb 2,13)

Teny ampy hampitosaka hafaliana feno fatra
Feo mamalifaly fo
sy mahasambatra tokoa
Ny hoe “matoky anao” izay mivoaka avy ao an-tratra.

Tenin-tiana mahalaza ny ho avy lakalaka
Hantahanta sesilany
Orokoroka tsy lany
Satria “matoky” ka tontosaina izay kinasa.

Tenin-dray andry iankinana, tenin-dreny tena tiana,
Atolony an’ireo ho “fara”ny
Ireo hanohy ny tantarany.
Eny sambatra ny zanaka rehefa itokiana.

Tenin-joky toa ray, fandrotrarana mandimby
Mampanantena fisondrotana
Toky azo isarangotana
Amin’ilay fotoana mahamalomaloka iny.

Tenin-kavana anatonana raha sendra adin-tsaina,
anaty haizina ny tena,
ka ny maso toa jambena.
“toky” iray dia ampy ho masoandro hamelona aina.

Teny entin’Andriamanitra hankahery sy hanampiana
An’ireo izay nofidiany
Sy ireo olon-tena tiany.
Ireo tokiny tanteraka amin’ny asam-pitoriana.

Teny entina hanamafy ny finoana tiana hivelatra
Hanamafisana safidy,
hilanjana ireo adidy
ny hoe : “Hatoky Anao aho, hatoky Anao tanteraka”.

Antsirabe 08 Aogositra 1998
--------