HAMY (tsiolaka)

Miverina manditsoka
Ilay vovoka fahiny
Niaraha-nilalao
teny an-dohan'ny vinany

Injao fa re niritsoka
tanatin'ny tadiny
ny angolam-peonao
ilay rotsaka tomany

Fa ny eto izao mamerina
ireo lasa tsara tefin'
ny vita sy tsy efa
ka mihovitra ao anaty

fa zary mitsingerina
anaty maridrefin'
ny vetso miantefa
ka mila tsy ho tanty

naninteraka ny tsiky
teo imolotro nahatsiahy
nisambaran'ny tadidy

eny satriko iky
ho iraina am-panahy
fa tadidy sarobidy
--------