TROSA (Vonjisoa ANDJANIRINA (RNMv))

Ny alahelo lalina
Tsy zaraina ny hafa,
Dia aizim-pito sy alina
Mitambatra ho lasa.

Ny ranomaso ferana
Sakanana tsy hivoaka,
Dia sento maka toerana
Tsy maintsy mbola hitroatra.

Trosa tsy voahefa
Ho enti-mandramaty,
Ny fitia rehefa
Kobonina ao anaty.

Ny tsiky sy hafaliana
Kobonina ao am-po,
Dia lalam-paniriana
Tiana ho verezin-jo.

Fery miali-taona
Tsy sitram-panafody,
Ho entina eny foana
Ny tanjona tsy tody.

Vonjisoa Andjanirina
24 sept 2024
--------