HAFATRO - raozy

HAFATRO

Raha tonga ny ampitso, ka torovana ny saiko
Ka izay hanefy tononkalo, ho lasa zavatra tsy haiko
Dia ahoana ny hoaviko, hanao ahoana ny fiainako ?

Raha tonga ny andro ratsy, ka handao ilay fanahy
Ka tsy hiainga intsony anatiko,  hisintaka tsy hanaraka ahy
Dia ahoana ny fijeriko, ary koa fomba fisainako ?

Raha tonga ny fotoana, any aoriana aza hitako
Ka misy loza tojo ahy, ka ny hanoratra tsy ho vitako
Dia ho aiza ianao ry aingam-panahy, sy ireto teny mba fananako ?

Raha tonga moa ilay andro, voatery handaozako ny tany
Rehefa tonga moa  ilay andro, tsy maintsy hisy ange izany
Dia ahoana sy hankaiza, ireto rangotry ny tanako ?

Raha any aoriana tonga izany,
Satria izay no lalan’ny tany
Dia izao no iangaviako anao

Raha any aoriana aho ka resy
Noho ny taona mifanesy
Dia etsy hafarako ianao :

Mba vakio re matetitetika, ireo tononkalo tiako indrindra
Mba aparitaho amin’ny maro, ireo soratro ilay mba narindra
Dia any aho handry soa, sy am-piadanana milamina

Mba aelezo izay mba tsara, na dia sombintsombiny aza
Mba hampahalalao ireo taranaka, ary hampamakio  koa re ny  zaza
Ireo taratasy raki-tsoratro, na tranokala mba nindramina

Mba zarao ho an’ny maro, na ny havana na koa ny hafa
Mba ampitao ilay fitiavako, ilay tenintsika ho tenin-tafa
Amin’izay ilay aveloko iny, tsy hanelingelina ny velona

Mba tantarao re ny fisiako, tsy ilay izaho fa ilay kantoko
Mba hirao indraindray, ireo tononkalo tena mamiko
Ka handry am-piadanana ahy, k’intsony tsy hiselontselona