01 Novambra 2019 (raozigasy)

01 Novambra 2019

Ny daty 01 novambra moa tsy diarin'olombelona
Fotoana hifamonjen'ny maty sy ny velona
Hifamelomana tantara, hifameloman-tsiahy
Angamba mety izany no nampanoratra ahy
….
Tsy afaka aho ry dada, hamangy anao am-pasana
K'anio aho aza andrasana
Izany tsy midika hoe adinoko ny lasana
Ka ny fahiny ndeha hovoasana

Fa mbola ao an-tsaiko sy ao am-poko ianao
Eny hatramin'izao
Tsy miato aho mahatsiaro, tsy hoe fomba amam-panao
Fa tena mbola ao

Mahazatra ny olona ny mametra-boninkazo ambony tranovato
Fa ny ahy ange ry Dada, tena mbola ianao no voninkazoko ato
Mbola ao ianao, manemitra ny foko, ireo taona lasantsika
Ireo fiaraha-mamy, ilay taiza izay napetraka, tsy misy iray tomika

© Raozigasy 01/11/19
--------