Natahotra (raozigasy)
(Nalaina tao amin'ny vetso.serasera.org)
Natahotra aho, matahotra Vao hitako ianao, dia natahotra aho hitafa
Asa tsy haiko mihitsy, izaho lasa hafahafa
Te hitsoaka,te hanatona, te hirifatra hilefa
Sady manontany tena hoe : maninona anefa
Vao nihaona isika, dia natahotra aho ny hiresaka
Ny lohako toa nihaboda, ny foko moa mila hitresaka
Ny saiko valalanina, ny tenako badenina
Te handroso mafy, nefa tsy te hanenina
Vao nifankahazo isika, natahotra aho ny hanoroka
Toa maiva-mavesatra, ilay vaika teo an-tsoroka
Ny bitaka tsy zaka, ny endina toa maika
Nifangaro voraka, ny sao sy ny saika
Vao isika nifanoroka, natahotra aho ny hanohy
Nanontany tena : hatraiza ny fivoy
Nitady tsy maharaka, ny hazaky ny saina
Satria teren’ny fo hoe : mamy ange ny miaina
Ankehitriny isika, efa mifankatia, mbola matahotra aho
Na dia efa lasana daholo, ireo zava-nifamaho
Matahotra aho indray, sao ianao milefa,
Rehefa vita izay, ny zavatra efa « efa »
Matahotra aho matahotra
29/07/2019
--------
Rohy:
