You are here: home > Vetso

Izany ka filoha - raozigasy

Izany ka filoha
Mahay manapatapaka , sy mandidididy
Ireo mpanao lalàna, sy mpampanoa ny didy

Izany ka filoha
Mahay midongy toerana, sy mihoatra fefy
manao bodongerona, sy jadon-tsy voarefy

Izany ka filoha
Mahay lohan’ampondra, mafy hoza-doha
mody miandry farany, amin’izay voaloha

Izany ka filoha
Mahay vavam-boloky, pentsona sy kinga
kanefa ny tanteraka, poak’aty sy mandringa

Izany ka filoha
Mahay lohan’alika, miverina amin’ny sisany
ka manara-penitra, amin’ny tanisany

Izany ka filoha
Mahay lohan’angidina, tia miriorio
tsy mahita lavitra, ankoatry ny anio

Izany ka filoha
Mahay lohan’ondry, manao totobory
ka misosososo, tsy hita hoe akory

Izany ka filoha
Manao lohan-dambo, tia mitrongitrongy
kanefa diso tetika dia avy eo midongy

Izany ka filoha
Manao lohan-tsaka, tia misolelaka
amin’ireo hafa, tsy ho ela dia hamelaka

Izany ka filoha
Manao loham-borondolo, miseho tsara fijery
Kanefa kely sisa, dia handeha irery

Izany ka filoha
Manao loham-boalavo, tia fakofakon’olona
Ka mizarazara ,sisantsisan-tolona

Izany ka filoha
Manao lohan-gidro, tia miakatrakatra
Nefa ny ambany maso, tsy misy iray mba rakatra

Izany ka filoha
Manao lohan’amboadia, mitafy zanak’ondry,
Misompatra ny kely, fa manana totohondry

Izany ka filoha
Manao loham-boay, hanao ampihi-mamba
Toy ilay iraika lahy taloha, efa jambajamba

Izany ka filoha
Manao loham-bibilava, mandady sy misoko
Na dia efa hita izao, fa tsy tian’ny antoko

Izany ka filoha
Manao lohan’akoho, mihira anaty fako
Efa difo-doto, mbola misarako  

Izany ka filoha
Manao lohan-tsokina, tia manani-bato
Nefa ho tapi-dalana , rehefa ato ho ato



ka raha samy loham-biby, aleo aho ho filoha
mba ho voromailala, fa tsy menarana do
dia aleo izay kely haiko, hanaovako baroa
fa impiry tokoa moa izaho no ho filoha













Hevitra mandeha

mitantsotia (16/09/2013 19:17:36)

K'hita ho'a maninona tokoa raha mba ianao no filoha fa tsy leiry e, tena efa mankaleo!!

Hametraka hevitra

Midira aloha