Nopehinao ilay tanana, (Aingankalo)

Nopehinao ilay tanana, hanokatra ilay boky
Efa tsara pirina, hoe… tsy ho sokafana intsony,
Nandraketana ireo tsiahy, ireo tomany, ireo toloko
Ireo niniana hoadinoina, ireo nokoloina tsy hifoha.

Kinanjo…

Nopehinao ilay tanana, hanokatra ilay boky
Dia nibosesika ireo sary, ireo teny, ireo fitaka sy toky
Tsy voatohitra intsony… nitriatra indray ilay ratra!!!!

Nopehinao ilay tanana, handray indray ilay penina
Efa tsara sarona, hoe… tsy hanoratra intsony.
Nanoratana fahiny, ireo lokaloka, kalokalo,
Ireo niriana mba ho tò, ireo nofinohy hotanterahina.

Kinanjo…

Nopehinao ilay tanana, handray indray lay penina
Nanasosa ireo kinasa izay tsy to, indrisy zary nenina!
Tsy voatohitra intsony… nitriatra indray ilay fery!!!!

Nopehinao ilay tanana, dia nakipiko ilay maso
Navadiko ny pejy, nakorisa indray ilay tanana
Hanoratra ny lasa, izay niriana sy kinasa,
Hanoratana ny anio, ny ratram-po sy ny hafaliana
Hanoratana ny ho avy, ny ampitso sy ny vina.

16/07/2024 15h42
--------