IREO REHETRA NOBEAZINA (Rasamindrakotroka Andry Tiana)
(Nalaina tao amin'ny vetso.serasera.org)
Mahatsiaro an'ireo rehetra,zandry zanaka nobeazina,
am-pitiavana tsy misy fetra,
ny nahatafitany no noezahina.
Maro ny tsy taova tsy volivolo,
nosokajina toy ny zanaka ;
nisongadina, naha velom-bolo,
olom-banona toa taranaka.
Ao ireo kibo iray no nifonosana,
nifanabe tamin-potoana sarotra ;
dobo iray no nilomanosana,
fiarahana niezaka no nasalotra.
Tsy adino ny zafy zanaka nateraka,
adidy an-tànana nomen-Janahary ;
nobeazina hianatra, tsy hifezaka,
miara-dàlana amin’ilay nahary.
Irin’olona, fa tsy haniry olona anie,
amin’ny asa sy ny tokantrano.
Hanatsara ny vita, hanohy hanabe,
marina, mahitsy toa fandrin-drano.
RASAMINDRAKOTROKA Andry Tiana
10 Septambra 2024
--------
Lien:
Commentaires
s19andry5851
(
10/09/2024 07:54)
Raha tiana handroso ny Firenena, tokony samy miezaka manabe araka ny toerana misy azy avy ny tsirairay.
N'inona n'inona lazaina, hafa ihany ny olona nianatra.
N'inona n'inona lazaina, hafa ihany ny olona nianatra.
s19andry5851
(
26/09/2024 18:20)
Misaotra an'iHery niantsa ny tononkalo, ho tahian'ny Tompo hatrany !
hery
(
26/09/2024 20:45)
Misaotra hatrany dia mazotoa e
