MISAOTRA ANAO (LAVENONA)

MISAOTRA ANAO

Ho anao ilay sakaizako nanampy teny foana
nampahery hatrany tamin'ny andro nitarainako
namafa ranomaso raha sendra izaho nisaona !
Misaotra anao manokana fa nisy tamin'ny fiainako !

Ho anao tsy nanadino sy nahatsiaro ahy
tsy sasatra nanohana ary koa nitondra am-bavaka
rahalahy sy anabavy, ray sy reny ara-panahy
isaorako etoana tsy misy ankanavaka !

Ho anao ....!
Ilay voaloham-pitiavana nampianatra ahy nitia
Nivadi-pitokisana ka lasana nifindra...
Raha izay hoe hanozona ataoko sanatria fa...
Isaorako hatrany ianao nampianatra ahy namindra !

Ho anao ilay olo-tokana namehy ny ratra-poko
ianao no nanasitrana ireo fery anatiko ao !
Avahako amin'ny maro ianao ry mamiko tsy foiko...
Tolorako fisaorana satria tsy mba nandao !

Ho anao ilay tsy nitsahatra nanjohy ny tononkaloko !
Nankafy hatrany, mihitsy tsy mba leo !
Sarobidy loatra ka tena tsy voavaliko
Fa ny azoko lazaina ?...isaorako ianareo !

LAVENONA
--------