FANOMEZANA (Ifanomezantsoa)

Nofinidiko tao anatin’ny maro
Ho namana tsy hifandao
Tiako sy maha saro-piaro
Ambonin’izao rehetra izao
Ka iriko ho taolan-tehezana

Ho tolorako ‘zay sarobidy
Mba ho lavitry ny fijaliana
Tsy hanarahako lalàna sy didy
‘zay sahy mampahory ny tiana
‘reo zatra mpanao an-detrezana


Tiako sy silaky ny aina
Hilazako ireo zava-manjo
Hamborahako irony taraina
Hilazako zay hafaliam-po
Nofinidiko ho FANOMEZANA


Hitondra ny voalohan’anarako
Fara-sentoko any aoriana any
Hamarana ny sombin-tantarako
Ka ny fitiavana havaliny izany…
ANDRIko ho FANOMEZANA!
--------