Tsy tonga ianao... (ABS)

Nanjombona ny tavako
Maizina ny lalako
Fa tsy nahita anao…
Nangaina ny fijeriko
Nitombo koa ny feriko
Fa tsy nahatsinjo anao…
Torovan‘alahelo
Ny fo mpamelovelo
Tsy nitafa taminao…
Ny molotro nihamaina
Lanaka ny saina
Nanantena hitojo anao…

Kanefa moa raha teo ianao
Tsy ho badenina ny saiko
Nipararetra ny aiko ?
Nihovitrovitra aho ?
Vao mainka koa ny vava
Hikombona tsy halaza
Fa mainka hipararetra
Hatrany anatiko rehetra…
Kanefa moa raha teo ianao
Ny fijeriko ho sahy?
Ny gadrako hivaha?
--------