SAINTSAINO KELY FA ! (Rasamindrakotroka Andry Tiana)

Nantsain'i s19andry5851
(Nalaina tao amin'ny vetso.serasera.org)
Ny siny feno tsy mba mikobana ;
Ny tsara fototra tsy hita hirodana.
Ny daba foana no manakoako ;
Ny adala no mihomehy tsy miato.

Ny mpivavaka no mahay mitalaho ;
Ny olon-kendry tsy manely tsaho.
Ny voakarama no manao kaonty fako ;
Ny mpisolelaka no mandoka tsy miato.

Ny olo-malina mitsinjo ny ampitso ;
Ny nianatra mieritreritra impito.
Ny olona bado no manaonao foana ;
Ny very saina no tsy manaja fotoana.

Ny te ho tafita misafidy ny lalany ;
Ny misaina mahandry ny anjarany.
Ny jiolahy no mpandatsaka aina ;
Ny kamo no tsy mampiasa saina.

Ny olo-mavitrika tsy miandry tolorana ;
Ny olon-te handroso manala fatorana.
Ny zatra miasa tsy mahalala sasatra ;
Ny tia Firenena miezaka mampakatra.

RASAMINDRAKOTROKA Andry Tiana
30 Jolay 2022
--------
Rohy:
Sokajy : fiainana - fananarana
860 5
Hevitra mandeha
s19andry5851 ( 25/03/2023 04:21)
AZA HADINO NY MANINDRY ILAY FO EO AMBONY IO MANAMARIKA NY FANDALOVANAO.
MANKASITRAKA TOMPOKO, SAMY HO TAHIAN'NY TOMPO HATRANY ISIKA !
Professeur Andry RASAMINDRAKOTROKA
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0103