setrasetra (IZY)

SETRASETRA

Hoy izy anakam-po: “ sompatra ny anjara”
fa tsato-tefona an-damosiny ny nofiny
voarara,
Navily an-kerisetra ve ny lalan’ny tantara.
sa kosa setrasetran’ny saina maramara?

Fitaka, …halany io voambolana io…
Mantsy ilay noheveriny ho fitiavana madio
nampisahotaka ny fiainany ho lasa ambony ambany,
nandoko ny masoandrony hirenty ngalingaly.

Efa manan-tompo sy vofatotra any ho any
ilay niloka toky saingy olo-tsy manjary.

Nataony tsara ketoka ny hidim-baravarana…
Nofihininy amin-kery ny mosoara teo an-
tanana…
Nosonafiny ilay kibo misy aina nitambarana…
Nirotsaka mangina ireo sentony mahalana…

Tsy tanany intsony ny rediredin-tsainy.
Tapa-kevitra izy hitafa amin’izato sombinainy.

“Sombinaiko tiako indrindra sy malalako ato
an-kibo,
tsy hadisoanao ny kapoka mandrivorivo,
izay manjapy mafy, mampivanditra an’i Neny.
Fa ny tany no malama, ny nofo no malemy.
Hoezahintsika avalona iny bokim-piainana
iny…

Ny hahatonga anao ho vanona no ahiko
ankehitriny”
.
AMAL
22 septambra 2014
--------