IZAO SORATRA IZAO (Njakahery ANDRIAMALALA)

IZAO SORATRA IZAO

Vavolom-belona tokoa,
Fa ny asa soratra dia kanto,
Mitahiry lovasoa,
Taona lasa aman-jato

Dia porofo hita maso,
Fa ny poeta dia mikalo,
Mandrary soratra tsy miato,
Ho amboaran-tonokalo

Dia ainga izay nanosika,
Fa misy hafatra hampitaina,
Ny any anaty toran-kovitra,
Fa ny tany mitaraina

Dia basy arangaranga,
Koa miala tsiny miala fondro,
Tsy hatao resa- dava,
Miomana izay voatondro

Dia bitsika any anaty,
Hitahiry ireo tsiaro,
Tsy ho rava na ho maty,
Na ireo izay nampimalo

No angady sy ny harona,
Ho anao izay hiatrik'ady,
Hitaiza koa ho olom-banona,
Amin'izay rehetra ho avy

Hanalanao sorisory,
Raha tojo adin-tsaina,
Hampitony ireo izay ory
Sy izay rehetra mitaraina

Mety ho ny fiainanao,
No izato tantarainy,
Koa lesona no andeha alao,
F'izay no tanjona tratrariny

Koa aza avelanao hangina,
Ry poeta namako isany,
Fa sorato ampitsikiana,
Dia tantarao izay zava-bitany

Njakahery ANDRIAMALALA
(11 Octobre 2024)
--------